للذكري و بس...

البوست ده للذكري مش اكتر ولا أقل، يعني مش لازم تقروه او براحتكم، الواحد بس اكتشف انه بيكبر و في تفاصيل كتير بتتنسي مع انها مش المفروض تتنسي و ليلة طويلة كدة،  خلينا في المهم.

الوقت ما بين الخامسة و السادسة صباحا.

اليوم، أوائل شهر تسعة، عام 2018.

إحساس عام بالراحة و السعادة مسيطر علي حواسي، إحساس بقالي كتير اوي اوي يعني تقريبا ماحستوش.القعدة علي البحر، راسي علي كتفهم، الصمت التام مع صوت الموج، الشمس و هي طالعة و رجلي في المياة و طرف بنطلوني اللي اتغرق.

دماغي كانت فاضية، فاضية بزيادة و مع ذلك كنت بفكر كتير اوي ورا، بفكر أنه الموضوع ده غريب اوي، و الإحساس ده أغرب و مكانه أغرب و أغرب. بس صح. إحساس أنه كل ده غريب بس صح، الناس دول صح، وجودي هنا صح، التوقيت ده صح، و أي حاجة هتيجي بعد كدة صح، حتي لو كان الخوف و إحساس ال "مش عارفة" ده موجود ورا و بيحاول يطلع لسة، هو صح. إحساس إن ده مش من يومين ولا تلاتة، ده من زمان اوي مع أنه في الحقيقة من يومين او تلاتة مكملش. إحساس أنه المفروض كان يحصل من وقت طويل أوي، بس هو إيه ده اللي يحصل؟

انا معرفش حاجة و خايفة من كل حاجة بس في نفس الوقت مطمنة بس دي تيجي ازاي أساساً، اهي جات. و كان في ضحك. ضحك كتير علي الخوف اللي كان مصر يطلع بس ماطلعش نحمد ربنا يعني. و ضحك علي كمية الذكريات اللي اتعملت في يومين. ضحك علي الحرام و صلاح الدين و الوعد و و و، ضحك علي الغروب اللي لازم نتفرج عليه و الفوتوسيشن اللي علي البحر و الناس اللي كانت بتصطاد حاجة، ايه هي مش عارفين لحد دلوقتي، و عمرنا ما هنعرف.ضحك علي صوت الغسالة و الاشباح اللي في البيت و النور اللي راح فجأة لوحده و مرجعش غير تاني يوم عادي جداً.

بعد كدة جات فقرة الكلام و كانت فقرة غريبة -مش الأغرب- بس غريبة و مسلية في نفس الوقت. كانت هادية أوي و كل الكلام طالع من ناس نص نايمة و في نفس الوقت فايقة. فقرة ما بتتعملش غير مع ناس معينة و بتيجي كدة معاهم عشان ممكن نقول كبرت عليها و بقت جزء من الروتين اننا نسهر نتكلم في أي حاجة و كل حاجة، بس مش مع أي حد او بمعني أصح مجربتهاش قبل كدة عشان اقرر تنفع مع حد تاني أصلا ولا لأ. 

بس هي طلعت تنفع باين كدة و مسلية اوي كمان، مع أنها مكنتش اول مرة نتكلم بس كانت أول مرة نتكلم كدة و احنا في نفس المكان، كان في حالة غريبة كدة مرتبطة بالقعدة دي انا عارفاها كويس اوي بس مكنتش فاكرة أنها موجودة هنا. مش هنكر ان اليوم ده كله كان غريب، حلو بس غريب عشان حاجات كتير مش عارفة ولا عايزة حتي احاةل اشرحها عشان عمرها ما هتطلع صح. بس ده يوم يعني انا اللي اوفر شوية في نفسي و بحلل كل حاجة و افكر فيها زيادة عن اللزوم فما علينا.

حد فاهم حاجة؟

يلا مش مهم.